Кога една активна состојка се комбинира со друга компатибилна активна состојка, ветувањето што го дал кремот за нега несомнено ќе се оствари и тоа за пократко време.
 


СОВРШЕН СОЈУЗ

Керамиди+ Пребиотици 
Ако керамидите се ѕвездените состојки во кремите, тогаш пребиотиците би ги нарекле тим за поддршка. А што би можела една ѕвезда без својот тим? Керамидите, како природни липиди, ја поткрепуваат кожната бариера (не дозволуваат слободните радикали да продрат во дермисот; ја задржуваат влагата во кожата). Но, нивната заштитна задача е олеснета кога зад себе ги имаат пребиотиците. Пребиотиците се нанесуваат локално и истите служат како храна за добрите бактерии. Хранејќи ги добрите, пребитоиците индиректно влијаат да се намалат лошите бактерии, а со тоа придонесуваат до посолидна бариера. Бидејќи лошите бактерии ги проголтуваат керамидите, тука се пребиотиците да го исчистат теренот за керамидите да можат слободно да делуваат. 

Салицилна киселна + Масло од моринга
Ниту една борба со акните не стартува без салицилна киселина, но за победа неопходно е маслото од моринга. Иако зборуваме за масло, истото има лесна текстура и не му тежи на лицето, а делува антивоспалително и антимикробно. Маслото од моринга нема капацитет да ги замени стандардните третмани против акни, затоа салицилната киселина не е под закана, но одлично ги надополнува истите. Мијте го лицето со салицилна киселина – таа ќе ја ексфолира кожата, ќе ги одзатне порите и на тој начин ќе создаде совршена подлога за морингата да пенетрира длабоко во кожата. Морингата пак, ќе го смири црвенилото и ќе ги уништи бактериите благодарение на нејзините сулфурни и цинкови особини. Нанесете неколку капки масло од моринга пред да нанесете хидратантен крем и СПФ.
 
СЕКОГАШ И СЕКАДЕ

Канабидол
Козметичката индустрија е решена да го вклучи канабисот на листатаактивни состојки. Кремите создадени од коноп – модифицирана верзија на марихуана со отстранет THC, легален во 50 земји – според многу дерматолози вреди да стане дел од секојдневниот ритуал за нега. Активната состојка во овие креми е всушност канабидолот,компонента на марихуаната која влијае на кожните рецептори одговорни за сензорните искуства. Канабидолот е одговорен за она чувство на нежност и мекост што настапува кратко по аплицирањето на кремот. Неговата вредност нема цена, особено за оние кои страдаа од болни кожни проблеми како егзема и псоријаза, па дури и обична иритација. 

Хијалуронска киселина
Речиси и да не постои крем на пазарот кој во својот состав нема хијалуронска киселина. Толку е посакувана, што во денешно време се инјектира во облик на филер кој има за цел да го зголеми волуменот на јаболкцата, усните или виснатите кесички под очите. Сепак, нејзината примарна цел е да обезбеди целосна хидратација за лицето, а тоа го прави во мега размери. Хијалуронската киселина не е само една од многуте состојки во кремите, таа го зазема централното место и во серумите. Имено, во нив се инјектира коктел од хијалуронска киселина со повеќе молекуларни тежини, за која научниците тврдат дека го поттикнува природното создавање хијалуронска киселина. На овој начин, кожата е хидратирана (и благо пополнета) однатре, а не само на површината. Бидејќи природниот процес на создавање хијалуронска киселина забавува после 20-тите, набавете си крем со време. 
 
Секоја дијагноза или состојба (физичка или психичка) длабоко во својот корен е обвиена со стрес. Стресот е најверниот животен сопатник на човекот! Колку и да му вртиме грб, тој наоѓа начин да се протне назад. Во денешното модерно и брзо време, доаѓа во пакет со чувството на исцрпеност. Дали станавме нација на физички преморени и психички опустошени индивидуи? Одговорот, секој од вас нека го побара во себе. Ние го имаме одговорот за тоа што да преземете за да не ја прегорите сијалицата докрај и да потонете во мрак од кој нема назад. 
Овојпат, мудроста доаѓа од Јапонија и истата има и име – Икигаи! Овој јапонски термин во слободен превод би гласел „причина за живот“. Икигаи значи да се има чувство за цел во животот, нешто што ќе ве поттикнува со полн елан да станувате од кревет. Мотив и цел поради кои ќе дишете со полни гради и ќе го живеете животот до максимум. 
Не случајно, голем број истражувања открија дека ваквото чувство го збогатува, но и го продолжува животниот век: го намалува ризикот од срцеви заболувања, мозочен удар, Алцхајмер, депресија; го подобрува квалитетот на сонот и сексуалниот живот. Јапонците имаат најдолг животен век во светот благодарение на оваа почитувана и применувана традиција. 

Земете лист хартија и нацртајте Венов дијаграм со 4 круга: 
1 круг е – Што сакате да правите?
2 круг е – Во што сте добри?
3 круг е – Дали на светот му е потребно тоа?
4 круг е – Дали може да заработите од тоа?
Икигаи – центарот во кој се пресекуваат круговите. 






Зебележете, само една четвртина од концептот е директно поврзан со работата. Во едно јапонско истражување, само 31 % од испитаниците својата работа ја сметале за свое икигаи. За споредба, во американското истражување на Pew Research Center, дури 51 % од испитаниците изјавиле дека нивниот идентитет го диктира работата.
Пишувањето книга е вредна аспирација, но не е икигаи, тврди Hector Garcia, ко-автор на Ikigai: The Japanese Secret to a Long and Happy Life. „Тоа е цел! Икигаи е: Сакам да пишувам колку што можам подобро, за моите идеи да го сменат светот.“ Комбинирајќи го она во кое сум добар и кое сакам да го правам, комуницирајќи и одговарајќи на потребите во светот, јас заработувам – тое е икигаи.
Икигаи не е лесно да се постигне, потребно е време и трпение за да го пронајдете своето. Дијаграмот и следните прашања, несомнено ќе ви ја олеснат потрагата.

Која е вашата најголема пасија?
Сетете се на моментите кои ви носат чувство на страст и слобода. За некој тоа може да е градинарството, за друг може да е пеењето, за трет може да е следењето политички дебати, а има и такви кои уживаат во решавање задачи. 
Страста може да е поврзана со она што го работите, но и не мора, вели психологот Chloe Carmichael. „Ако својата цел (своето икигаи) ја барате во работата, мора прво да разберете од кои причини работата ви дава цел и смисла за живот“, објаснува таа. „Дали комуницирате, образовате, инспирирате или помагате при создавањето продукт кој ќе им го олесни животот на луѓето?“Или од друг агол, дали вашата работа ќе донесе нешто големо за луѓето околу вас – дом, стабилност, ресурси за вашата фамилија? И тоа може да биде извор на икигаи. 

Кои се вашите вредности?
Истражете што е она што во вас поттикнува чувство на почит и воодушевување? Изненадувачки, но многу лесно ќе дојдете до срцевината на она што вам ви е најважно во животот. Еве една идеја: Напишете ги имињата на четворицата луѓе кои го држат централното место во вашиот живот, за секој од нив наведете по 5 особини поради кои завршија на вашата листа. Тука може да дојде предвид и вашиот идол кој никогаш не сте го запознале.
Особините што ги набројавте, како добрина, трпеливост, силна етичка професионалност, најверојатно ги посакувате за себе. Дозволете им на овие вредности да го водат вашиот начин на размислување и вашето однесување, и за кусо време ќе станат неразделен дел од вас. Ако живеете по нив – да речеме, свесно покажувате трпеливост додека ја воведувате новата колешка во работата – вие сте се поблиску до вашето икигаи. 

Која е шемата во вашиот живот? 
За повеќето луѓе, икигаи не е фиксен концепт, тој се менува и созрева напоредно со човекот.„За некои игикаги е имањето деца, но штом децата пораснат, енергијата треба да се насочи на нешто ново“, вели Garcia.Но, она што останува непроменето е суштината, она што ви дава задоволство, она што ви дава смисла за постоење. Штом заклучите што е тоа, вие го имате своето икигаи. 
Еве еден (измислен) пример: Ивана е успешна во својата кариера, иако е целосно исцрпена и има чувство дека нема повеќе што да даде. Единственото нешто што ја исполнува е дружењето со нејзините колеги. Таа ужива да ги слуша нивните проблеми, се соживува со нив, а врвно задоволство ѝ причинува давањето искрен совет. 
Кога подобро ќе размисли, таа и меѓу пријателките важи за одличен советодавец. Барајќи го своето икигаи, Ивана заклучи дека ѝ треба промена на професијата. Денес, како терапевт, одлично ги користи своите способности за слушање и емпатија (круговите 1 и 2) во кариерата (круговите 3 и 4) и ете го погодокот точно во центарот. 

Дали имате своја заедница?
Вашата страст, вашите вредности, вашата шема, истовремено се поврзани со луѓето околу вас. „Среќата ја доживуваме како нешто кон кое треба да се стремиме за да го постигнеме – да речеме, преку читање книги за самопомош“, вели Ruth Whippman,автор на America the Anxious. „Но, истражувањата покажуваат дека најголемиот извор на среќа се добрите социјални врски.“ И додека откривањето на вашето икигаи подразбира длабока себе-рефлексија, другите луѓе се интегрален дел од процесот. Погледнете убаво во дијаграмот, сѐ е поврзано на најдобар можен начин!
 

Икигаи по брза постапка
Направете табла за среќа.Визуелна табла, но со фотографии од телефонот од нештата кои ве инспирираат. Вашето икигаи можеби се крие меѓу нив.
Замислете си го сопствениот погреб.Звучи морбидно, но запрашајте се како сакате да ве запомнат. Фокусот сигурно нема да биде на работата, туку на она што го постигнавте за луѓето што ги сакате и за светот воопшто. 

 

Ако консумирате помалку од 2 000 калории, а практикувате вежби за издржливост, несомнено се изложувате на ризик од RED-S.
 

Причини за неплодност има многу, но малкумина знаат дека и прекумерното вежбање е една од нив. Зошто? Бидејќи оној што вежба по автоматизам е здрав, дури и кога не е! Бројот на прекумерни вежбачи се зголемува од минута во минута. Сакате доказ? Неодамнешното истражување на познатиот магазин за жени „Woman’s Health“, покажа дека 90 % од читателките сакаат помалку сало на себе, додека една третина би биле среќни со дури 6 килограми помалку. 

Како вежбањето може да биде проблем? 
Сѐ се должи на едноставниот, но многу малку познат концепт наречен релативна енeргетска дефициенција во спортот – RED S.Жените се соочуваат со нерегуларен менстурален циклус или сосем го губат циклусот токму поради недостиг на енергија. 
„RED S е нееднаквоста помеѓу внесот на храна (енергијата и микронутриентите што ги консумирате) и хранливите материи потребни за да дојдете до енергијата што, прво, ќе ги покрие  функциите на организмот, а потоа останатите домаќински, професионални задачи и спортски цели“, објаснува спортскиот ендокринолог д-р Nicky Keay. Како смартфон со 9 % батерија, за да не ви се исклучи, ја ставате батеријата на штедење при што автоматските функции – во случајот на жените тоа е месечниот циклус – се гасат.
Но, секоја жена е различна, а со тоа и размерот на последиците. Режимот на исхрана и нивото на мастите кај една жена можеби ќе успеат да го задржат редовниот менструален циклус, но кај друга може да го срушат целиот репродуктивен циклус.
„Кога сте фокусирани на значително намалување на вишоците, без разлика дали практикувате екстремен спортски режим и/или држите диета, телото согледува дека сте под стрес и одлучува дека не е време за репродукција“, вели д-р Meggie Smith, од „University of Southern California“.„Сигналите од мозокот до јајчниците, познати како оска на хипоталамус – хипофиза – јајчници, не функционираат. Лутеинизирачкиот хормон(кој ја поттикнува овулацијата) не се лачи, а пак јајчниците ниту исфрлаат јајце-клетка ниту пак создаваат естроген и прогестерон.“
И додека прекумерната телесна тежина и дебелината му сметаат на репродуктивниот систем, бидејќи во тој случај телото се соочува со преголеми дози естроген, овде станува збор за сосем спротивно сценарио кое во најлош случај може да го забрза настапувањето на менопаузата, предупредува д-р Smith. 

Вистинскиот пат до посакуваното тело
Во минатото, ваквиот феномен беше својствен за професионалните спортистки (69 % од навивачките на колеџ и 65 % од маратонките имаат нередовен менструален циклус), но денес со достапноста на програмите за вежбање дури и на социјалните медиуми, на удар се и спортските лаици. 
Приказната не завршува со менструалниот циклус, енергетскиот дефицит го забавува метаболизмот, го намалува имунитетот, го зголемува уморот, влијае на кардиоваскуларниот и на дигестивниот систем. 
„Според моето искуство, на најголем ризик се изложени жените во 20-тите за кои мајчинството сѐ уште е далечно, а добрата фигура посакувана“, вели Laura Clark, диететичар и спортски нутриционист. „На оваа возраст, девојките вежбаат секој ден, честопати и два пати дневно. Интензивниот тренинг е прифатлив, сѐ додека е поткрепен со храна која ќе ги задоволи енергетските потреби на сите нивоа.“ 
Што се однесува до дилемата, што е полошо, премногу вежбање или премалку храна, д-р Smithвели дека калориската рестрикција е многу поопасна отколку високо интензивните тренинзи. 
Студијата „Neuroendocrinology of Nutritional Infertility“ откри дека е доволно само 1 месец без доволно енергија за да се загрози редовноста на менструалниот циклус. Во меѓувреме, можете да побарате и плус знаци дека сте тргнале по погрешен пат да слабеете. Опаѓање на косата, нови влакненца по телото, подуен стомак. Во суштина, ако целиот ваш живот е подреден на терминот за вежбање, запрашајте се дали има логика форсирањето. Запомнете, кога вежбате толку интензивно, вашиот мозок треба да биде насочен кон тоа што да додадете на менито, а не што да одземете.


 Не заменувајте ги јаглехидратите со протеини! 
Доколку на телото му недостасува гориво (јаглехидрати), тогаш телото ќе почне да ги конвертира протеините наместо да ги користи како градбени единици за мускулите. Во деновите кога тренирате, јадете повеќе скроб и шеќер – овошје и зеленчук.

Ова е лекција за секој родител и за секој млад човек кој е заробен пред синиот екран. Документарецот е фокусиран на лошите аспекти од користењето на социјалните платформи. Самите креатори зборуваат за опасностите од нивниот производ откривајќи ја големата тајна што се крие зад екранот. 
Првиот анимиран филм излезе во 2013-та, по чиј успех следуваше второ продолжение, лани, насловено како The Croods: New Age. Дејството на филмот го следи животот на пештерското семејство Croodsи нивните авантури во непознатиот фантастичен свет. Одличната актерска екипа која учествуваше позајмувајќи ги гласовите на ликовите, како Николас Кејџ, Ема Стоун, Рајан Рејнолдс, ветуваат одлична забава за целото семејство. 
Главните улоги го толкуваат Никол Кидман и Хју Грант, а тоа несомнено ја прави привлечна оваа мини серија од 6 епизоди. Никол Кидман ја толкува улогата на Грејс, богата терапевтка од Њујорк чиј живот ќе се преврти наопаку откако таа и нејзиното семејство ќе бидат инволвирани во смртоносен случај. Во суштина, серијата е одлична модерна верзија на класична детективска сторија која никој не остава рамнодушен.  
Пред да се пожалите дека скапиот крем за лице што го купивте не вреди ниту денар, запрашајте се дали можеби сами ги саботиравте резултатите? Да се потсетиме, трпението е клучен фактор, но целиот животен стил игра голема улога во тоа колку производите ќе го испорачаат ветеното.

Не спиете доволно
Недостигот на сон предизвикува хаос во целиот организам, но се чини дека негативните нуспојави се највидливи на кожата. Бидејќи кожата се регенерира додека спиеме, помалку часови подразбираат покуса поправка, а тоа резултира со уморен и стар изглед. Спиењето помалку од осум часа во континуитет, несомнено ќе доведе до појава на митесери, сувост и воспаленија. 

Нанесувате премногу производи на лицето
Преголемото изложување на различни агресивни супстанции честопати резултира со иритации и црвенило. Ако имате потреба истовремено да третирате повеќе проблеми на кожата, а тогаш е неизбежно да нанесувате повеќе производи, погрижете се барем дел да бидат од органско потекло.

Ја прескокнувате регијата околу очите
Упатството за употреба кај речиси сите производи гласи: избегнувајте ја нежната и деликатна регија околу очите. Но, неопходно е и да набавите лесен хидратантен крем за околу очи, бидејќи тие први ги издаваат годините.

Си легнувате со шминка
Сите некогаш сме легнале без да ја извадиме шминката, но важно е да не ви стане навика. Шминката буквално го блокира процесот на регенерација што се случува во текот на ноќта. Резултат? Затнати пори и забрзано стареење.

Не внимавате на исхраната
Процесираната храна оптоварена со заситени масти, рафинирани шеќери, вештачки вкусови и сол, се директен причинител на митесери и акни. Повремено, дозволувајте си по некој вкусен грев, но за здрава кожа форсирајте витамини, минерали и здрави масти. 
Протеините не се гориво само за мускулите, неопходни им се и на фоликулите. За максимум ефекти, вклучете ги и во исхраната и во негата на коса. 
 
Зошто протеините се неопходни?
 

...во исхраната
Аминокиселините – радбените единици на овие макронутриенти се клучни за создавање и раст на кератинот или главната структурна компонента на влакното. Консумирањето протеини од животинско потекло е најдобриот начин за да дојдете до дневната доза на аминокиселини, но ако сте вегани или вегетаријанци, погрижете се да ги обезбедите преку намирниците наведени подолу. Што се однесува на количеството, целете на 30 г протеини трипати дневно за да направите разлика кај изгледот на косата. Знаци дека не ја внесувате препорачаната доза? Коса без сјај и косопад. 

...во негата на коса
Бојадисувањето, стилизирањето со фен и надворешните агресори (УВ-зраци, ветер, сув воздух) ја одземаат влагата од косата и ги еродираат аминокиселинските ланци кои, пак, го создаваат кератинот во секое влакно. Штом дојде до оштетување на тие ланци, ќе забележите дека косата станува кршлива, врвовите се двојат и, генерално, косата е груба. Производите за нега на коса коишто се базираат на протеини, имаат моќ да ги пресоздадат аминокиселинските ланци и да ја заробат влагата во влакното. Спротивно на некогашното уверување, редовната употреба на ваквите формули нема да ја ослабат косата; протеините што влакната нема да ги апсорбираат ќе ги измие водата. Но, интензивните протеински третмани може да ја направат косата потешка, затоа користете ги еднаш до двапати неделно. 

 
Задолжителни на менито
Овие намирници се богати со протеини што имаат моќ целосно да ја трансформираат косата.
 
Соја 
Сојата во зрно е одлична ужина за грицкање пред ТВ, а само половина шолја ќе ве снабди со 9 грама протеини.
Бадеми
Вкусни се и кога не се солени, а една четвртина шолја ќе ве снабди со 7 грама протеини коишто косата со задоволство ќе ги искористи.
Грчки јогурт
Оваа ужина (веќе достапна и кај нас во поголемите маркети), се комбинира и со овошје и со зеленчук. Една шолја ќе ве снабди со 15 грама протеини.
Јајца
Секогаш кога сте гладни, а немате време за готвење, сетете се дека можете да си сварите јајце. Само едно и вие сте обезбедиле 6 грама протеини. 

За Нас

Ваш Аптекар, наменето да ги задоволи вашите потреби за квалитетни информации во врска со употребата на лековите и другите средства кои ги земате во аптеките. Ние се грижиме за вашето здравје и ќе ви обезбедиме интересни содржини кои директно ќе влијаат врз вашиот приод кон лекувањето и начинот на живот воопшто.

Следете не на Facebook

Newsletter

Внесете ја вашата е-пошта и навремено дознајте за сите новости и информации поврзани со Ваш Аптекар.